Pantanasími: 535 4000 pantanir@ojk.is

Fyrirtækið

Sagan í stuttu máli.

Ó. Johnson og Kaaber er elsta íslenska heildverslunin. Fyrirtækið var stofnað 23. sept. 1906 af þeim Ólafi Þ. Johnson og Ludvig Kaaber. Fyrstu sex árin var fyrirtækið til húsa í Lækjargötu 4 en árið 1912 flutti það í Hafnarstræti 1-3 (Fálkahúsið). Í gegnum árin hefur fyrirtækið lagt megináherslu á innflutning matvöru auk hreinlætisvara af ýmsu tagi. En fram eftir síðustu öld fengust menn líka við útflutning íslenskra afurða. ÓJ&K átti hlut í lýsisbræðslu um skeið og seldi lýsið utan. Auk þess voru fluttar út saltaðar sauðagærur, ullarvarningur, kjöt og fiskur. Útflutningurinn lagðist þó smám saman af en í staðinn var hafin iðnframleiðsla á ýmsum vörum innanlands.

Um árabil starfrækti OJK kaffibætisverksmiðju, framleiddi salernispappír, reiknivélarúllur og pappírspoka, rak sultugerð og hefur lengi átt hlut í Vilko sem framleiðir súpur og bökunarblöndur af ýmsum gerðum. Flaggskipið í framleiðslunni hefur þó alla tíð verið kaffibrennslan. Kaffibrennsla OJK var stofnuð í júní 1924 og var fyrst til húsa í Hafnarstrætinu. Byggt var sérstaklega yfir brennsluna og kaffibætisverksmiðjuna á 5. áratugnum við Sætún og stendur verksmiðjuhúsið þar enn. Aftur var byggt yfir kaffibrennsluna á sjöunda áratugnum og þá uppi í Árbæ. Nýir tímar fylgdu nýrri öld og á árinu 2000 sameinuðust Kaffibrennsla ÓJ&K og Kaffibrennsla Akureyrar undir merkjum Nýju kaffibrennslunnar. Var þá hætt að brenna og mala í Árbænum. Brennslan fyrir norðan sér um alla framleiðsluna, en sala og dreifing fer fram hjá ÓJ&K sunnan heiða. Og kaffið okkar þekkja allir: Margar tegundir af Rúbínkaffi auk hinna gamalkunnu tegunda sem kenndar eru við Braga og Kaaber.

Eins og gefur að skilja hefur ýmislegt breyst á þeim ríflega 100 árum sem fyrirtækið hefur starfað. Segja má að ÓJ&K hafi flutt inn vörur úr öllum flokkum – allt frá önglum upp í hjúkrunarvörur og bíla! Innflutningur á mat og hreinlætisvörum hefur þó ávallt verið grunnur starfseminnar og svo er enn í dag.
Höfuðstöðvar fyrirtækisins hafa líka verið fluttar nokkrum sinnum. Úr Lækjargötunni var flutt í Hafnarstræti og þaðan áfram í Sætúnið árið 1962. Þar var byggt myndarlegt skrifstofu- og verslunarhús sem einnig hýsti dótturfélagið Heimilistæki. Árið 2004 var svo tekið í notkun sérhannað vöru- og skrifstofuhús við Tunguháls og þar erum við nú til húsa.

ÓJ&K rekur í dag öfluga heildsölu sem selur m.a. vörur til matvöruverslana, stóreldhúsa, mötuneyta og sælgætisverslana auk ýmissa sérverslana. Í dag vinna rúmlega 50 manns hjá fyrirtækinu bæði í Reykjavík og á Akureyri. Fyrirtækið er umboðsaðili fyrir mörg þekkt vörumerki s.s. Colgate Palmolive, Wagner, Del Monte, Melroses, Kiwi, Pågens, Tate&Lyle, DeliFrance, KIM’s, Philips Lighting, Vilkó, Mömmu, Rúbín, Braga, Kaaber o.m.fl.

Fyrirtækið á Nýju Kaffibrennsluna á Akureyri og er hluthafi í Vilkó á Blönduósi